پاکستان کرکٹ ٹیم کو دورہ نیوزی لینڈ سے قبل بڑا دھچکہ لگا ہے لیفٹ آرم فاسٹ بولرجنید خان پاؤں میں ہلکا ہیر لائن فریکچر کی وجہ سے ٹیم سے باہر ہو گئے ہیں

پاکستان کرکٹ ٹیم کو دورہ نیوزی لینڈ سے قبل بڑا دھچکہ لگا ہے لیفٹ آرم فاسٹ بولرجنید خان پاؤں میں ہلکا ہیر لائن فریکچر کی وجہ سے  ٹیم سے باہر ہو گئے ہیں

ذرائع کے مطابق پاؤں کی اسکین رپورٹ منگل کو پی سی بی کو ملی جس میں جنید خان کو چھ ہفتے آرام کا مشورہ دیا گیا ہے اور جنید خان کی جگہ آل رائونڈر عامر یامین پاکستانی ٹیم میں شمولیت کے مضبوط امیدوار ہیں۔

ذرائع کا کہنا ہے کہ پی سی بی کے میڈیکل پینل کو جنید خان کی فٹنس رپورٹ منگل کو مل گئی ۔ جس میں انہیں مکمل فٹ ہونے کے لئے چھ ہفتے کا وقت دیا گیا ہے۔

جنید خان پاکستان کرکٹ بورڈ کے میڈیکل پینل کے پاس لاہور کی قومی اکیڈمی میں زیر علاج ہیں ۔ جنید خان بنگلہ دیش پر یمیئر لیگ کے دوران ان فٹ ہوئے تھے۔

ذرائع کا کہنا ہے کہ جنید خان کی جگہ عامر یامین کی شمولیت کا حتمی فیصلہ کوچ مکی آرتھر کے مشورے سے کیا جائے گا۔ ذرائع کا کہنا ہے کہ امام الحق کے پاؤں میں بننے والے فنگس کی تکلیف میں افاقہ ہوا ہے اور وہ نیوزی لینڈ کی ون ڈے سیریز کی ٹیم میں شامل ہوں گے۔

نیوزی لینڈ کے دورے کے کیمپ کے لئے پاکستان کے بیس کھلاڑیوں کے ناموں کا اعلان اگلے ایک دو دن میں کردیا جائے گا۔ کیمپ سے قبل 22 دسمبر کو لاہور میں کھلاڑیوں کے فٹنس ٹیسٹ ہوں گے۔

ذرائع کا کہنا ہے کہ کیمپ میں اوپنر اظہر علی اور محمد حفیظ شرکت نہیں کریں گے۔ دونوں جمعرات سے نیشنل اسٹیڈیم میں قائد اعظم ٹرافی کے فائنل میں شرکت کریں گے۔ اظہر علی اور محمد حفیظ سوئی ناردرن گیس کی نمائندگی کرتے ہیں۔

 اظہر علی اور حفیظ کا فٹنس ٹیسٹ فائنل میچ کے بعد ہوگا۔ پاکستانی ٹیم 26 اور27 دسمبر کو لاہور سے روانہ ہوگی۔ اس سے قبل تین دن کے کیمپ میں کھلاڑی سیریز کی تیاری کریں گے۔

ذرائع کا کہنا ہے کہ پی سی بی حکام کا خیال ہے کہ کھلاڑیوں کو کیمپ سے بہترہے کہ وہ میچ پریکٹس حاصل کریں۔ فائنل ختم ہوتے ہی دونوں کھلاڑی لاہور جا کر فٹنس ٹیسٹ دیں گے۔ پاکستانی ٹیم کا اعلان 23 یا 24 دسمبر کو کیا جائے گا